Ganz vorbi isch s 2020 no ned. E paar Stund fähled no bis ins 2021. Mir wend aber scho Rückschau halte uf das, wo z Wettige gsi isch und – im Blick uf das bsunderi Johr – ned gsi isch.
Januar:
– Di reformiert Chilegmeind fiired ihres 100-jährige Jubiläum.
– S St. Bernhard teild mit, dass s noie Alterszentrum im Langäcker au St. Bernhard wird heisse und ned ALTSTADT.
– Zum erschte Mol wird en Wettiger Landamme.
– D Post im Volg isch eröffned worde.
– Sächs Wettiger sind Europameischter worde.
Februar:
– De Minichreisel isch gar ned so tüür, wi behaupted.
– D Stimmbevölkerig lehnd s Budget 2020 ab.
– D Dame und d Herre vo Rotwyss werded Schwiizermeischter.
– De Marcel Käufeler wird mit em Team Schwaller Schwiizermeischter im Curling.
– D Nachtabschaltig vo de Strassebelüchtig wird umgsetzt.
März:
– Corona chunnd nöcher: s Huus 1 vom St. Bernhard goht in Isolation.
– De Schuelpflägpräsident git sin Rücktritt bekannt.
– D reformiert Chilegmeind said d Spaghettata ab. Was zu dem Ziitpunkt no niemed weiss: Si finded im ganze 2020 nümm statt.
– Ab Mitti März finded sich bi oisene Meldige fascht numme Artikel zu Absage vo Veraastaltige.
– Im Interview mit em Pfarrer Stefan Burkhard chund d Frog uf:
«Goht oises geile Läbe grad de Bach abe?»
– D Gmeind git bekannt, dass d Jahresrächnig 2019 positiv abschlüsst.
– D Schlüssig vo de Läde isch für d Einzelhändler ned eifach: Interview mit em Dressmaster Philip Keller.
April:
– De Wettiger Arzt Thomas B. wird vo de Sondereinheit Argus in sinere Paxis festgnoh.
– De FC git de freiwillig Abstieg us de 2. Liga interregional in di 2. Liga regional bekannt.
– Di katholische Pfarreie übechömmed noii Seelsorger.
– S Jubiläumsfäscht «Atmosphäre – 975 Jahr Wettige» wird definitiv abgsaid.
– D Wystärn Wettige AG präsentiert ihri Wy.
Mai:
– D Restaurant hend wider chönne öffne.
– De Wochemärt het wider chönnd starte.
– Di Reformierte fiired Uffahrt und Pfingste online.
– «Das Zelt» produziert uf de Zirkuswise d Fernsehsendig «Wir sagen Danke».
– Im Zämmehang mit de Ufzeichnig vo de Sendig interviewed mir de Florian Ast, de Jason Brügger, de Luca Hänni, d Linda Fäh und de Rob Spence.
-S saniert Tägi goht uf.
Juni:
– Uf de Zirkuswiese gits erschtmols es Autokino.
– De Iiwohnerrot verlegd sini Sitzige ins Tägi.
– D Eröffnigsfiir vom Tägi muss usfalle, aber es git en «Tägi-Triathlon».
– S Maislabyrinth 2020 cha stattfinde.
– En Wettiger Rotwy wird Aargauer Staatswy.
Juli:
– De erschti Rundi Tisch vom Gmeindrot mit de Ortspartei und Iiwohnerrotsfraktione zeiged, dass in Sache Finanze uf Wettige schweri Ziite zuechömmed.
– D Gmeind unterzeichned e Leistigsveriibarig mit de Spitex.
– De Sportplatz in de Bernau übechund en noie Kunstrase.
– D Brugg zwüsche Noiehof und Wettige isch numme no in einere Richtig offe.
August:
– Di 1. August-Aasprach vo de Grossratspräsidentin isch online.
– De Rothuuschreisel wird noi gstaltet.
– De Wettbewerb «schnällscht Wettiger und schnällscht Wettigeri» het trotz Corona stattgfunde.
– LägereBräu lanciert e noii Fassbrause.
– D «Kunst am Bau» vor em Tägi wird enthüllt.
September:
– De Budgetentwurf 2021 vom Gmeindrot gseht en Stüürfuess vo 95 % vor.
– S Thema Littering chunnd immer wider emol uf de Tisch.
– D Firma Obrist präsentiert s erschti vollelektrisch Kehrichtfahrzüüg.
– D Finanzkommission fordered en Stüürfuess vo 98 %.
Oktober:
– Mir hend uf de Holzbrugg vorbiglueged, wo zur Ziit saniert wird.
– D Iiwohnerrotssitzig wird wege Corona kurzfristig abgsaid.
– D Post git ihre noie Filialplan bekannt.
– Wettige het witerhin 7 Grossröt. Zu de sächs bisherige, wo wider gwählt worde sind, chunnd d Manuela Ernst.
– S Fotistudio 5430 wird schlüsse.
– De Gmeindrot überlegd s Ferieheim z Ftan z verchaufe.
November:
– D Brugg zwüsche Noiehof und Wettige isch wider offe.
– En Wettiger wird Präsident vom FC Basel.
– S Jubiläumsbuech «975 Zeilen» wird lanciert.
Dezember:
– S Samichläusle laufd im Coronajohr e chli anderscht…
– S Stärnsinge falld us, aber mir hend Videos vo de vergangene Johr.
– D Kunstschau 5430 cha numme mitere Online-Vernissage starte und muess nach wenige Täg scho wider schlüsse.
«Minichreisel» wird zum Wettiger «Wort vom Johr».
– De Ronald Rickenbacher wird Vorsteher vom Amt für Militär und Zivilschutz vo Nidwalde.
– Nach wit über 30 Johr zügled d Müetter- und Väterberotig.
– S Budget 2021 wird vom Stimmvolk dütlich aagnoh.