Sit Mitti März dörfed kei Gottesdienscht meh stattfinde. Für Uffahrt und Pfingschte goht di reformierte Chile Wettige-Noiehof jetzt online.
De «Lockdown» het d Chilene härt troffe. Alli Gottesdienscht und Veraastaltige hend müesse abgsaid werde, Seelsorgebsüech sind nümm oder numme in streng greglete Usnahmefäll mögli und bi Bestattige sind es Zitli d Aazahl Lüt am Grab uf föif beschränkt gsi. Vieles laufd jetzt digital, so de Ustuusch innerhalb vo verschidnige Gruppe, Sitzige und vieles meh.
Di reformiert Chilegmeind teild jetzt mit, dass si an Uffahrt und Pfingste über ihre YouTube-Kanal Gottesdienscht wird aabüte. Warum numme a dene Fiirtig, chönnd me froge, aber d Chilegmeind het ihri Gründ, wi si laht lah mitteile: «Di meischte vo oisne Gottesdienschtbsuecher sind ned internetaffin, so dass mir über den Kanal numme en Bruchteil vo oisere ’normale Gottesdienschtgmeind‘ würded erreiche.» An Fiirtige sig das aber anderscht. Da chömmed dütlich meh Lüt und ebe au settigi, wo vertraud siged im Umgang mit de soziale Medie.
«Ig hoffe, dass mer mit de beide Online-Gottesdienschte grad a de Fiirtige einige vo üsere Chilegmeind chöi e Fröid mache und dass mir uf ene ganz nöi und ungwohnti Art merke, wie mir doch verbunde si,» so d Pfarreri Kornelia Baumberger-Dängeli, wo de Gottesdienscht für d Uffahrt gschtalted het.
De Gottesdienscht cha me über d Homepage vo de Chilegmeind finde oder direkt uf em YouTube-Kanal. Z beachte isch dodebi, dass de Link erscht an Uffahrt, 21. Mai 2020 um 10.30 Uhr freigschalte wird, ebe dann, wenn de Gottesdienscht eigentli het selle stattfinde und das er z Noiehof im Chilegmeindhuus ufzeichned worde isch
De Link für de Pfingschtgottesdienscht wird im Lauf vo de nächschte Woche verfüegbar si.