D Städt werded immer tüürer. so dass bsunders Familie us Züri, Basel oder Bern in di umliegende Gmeinde uswiiched. S Beratigsunternehme Wüest Partner het für d NZZ usgwertet, welli Gmeinde di günschtigscht isch.
Wüest Partner het für das Ranking 116 Gmeinde mit mindestens 10’000 Iiwohner vergliche und vili werded es ned glaube: Uf em erschte Platz landed Wettige als Gmeind, wo für Familie am attraktivschte isch. Watson rechned mit de Zahle vo de NZZ vor, wie es für e vierköpfigi Familie usgseht. In de Modellrecnig gohts um Eltere, wo zämme 180’000 Franke brutto verdiene und e 130-Quadratmeter-Wohnig gmietet hend. D Choschte für Miete und Stüüre isch bi de Untersuechig ins Verhältnis zu Arbetsplätz, Erreichbarkeit und Infrastruktur gsetzt worde. In de Top 10 sind dodebi numme Zürcher und Aargauer Gmeinde und uf em erschte Platz isch Wettige vor Urdorf, Dietike, Spreitebach, Walliselle und Chlote. Z Wettige liegd de monatlich Mietzins für e Wohnig nach dere Uswertig bi 2’740 Franke. Zämme mit de Stüüre zahld e Familie öppe 53’600 Franke im Jahr. Z Cham oder Baar isch de Mietzins mit über 4’000 Franke dütlich höcher, so dass d Stüüre, wo unter 10’000 Franke liged, das ned chönnd usgliiche. Es lohnt sich, en Blick uf de Watson-Artikel z werfe und dete d Tabelle z studiere.