Nach de Ablehnig vom Budget 2020 wot de Gmeindrot au 2021 bime Stüürfuess vo 95% bliibe. D Finanzkommission stelld en Aatrag für 98%.
D Finanzsituation vo de Gmeind esch schwirig. Die gebundene Usgabe stieged, d Stüürerträg sinked, au wege de Coronakrise. Do dezue chömmed die höche Investitione vo de letschte Johr und die ahstehend, bsunders bi de BEZ und de Schuel Alteburg. De Gmeindrat hed us dem Grund au i dene Bereich Sparmassnahme beatreid, wo’s weh tued, wie zum Bischpil bim Kurtheater.
Au d Finanzkommission gseht schints nümm veel Sparpotential, falled doch d Lischte vo de Aaträg für Iisparige dütlich chürzer us wie im letschte Johr und send d Beträg im Verglich zu de Budgetsumme marginal. D Finanzkommission schiint us dem Grund d Notbremse z ziehe und fordered, gege de Aatrag vom Gmeindrat, e Erhöchig vom Stüürfuess vo 95 uf 98 %. Me dörf also au i dem Herbscht gspanned sii uf d Budgetdebatte!