De FC stiigt freiwillig ab

De FC Wettige stiigd freiwillig ab. In de Saison 2020/21 tschutet de Verein in de 2. Liga regional.
Sit em März 2020 dörf me in de Schwiiz wege de Coronavire nüm Fuessball spile und d Saison isch in de Zwüscheziit abbroche worde. Für d FC Wettige het das gravierendi Folge. Es git kei Iinahme us de Heimmatch und d Wettiger Fuessballtäg, wo en wichtige Zuestupf für de FC bringed, sind abgsaid worde. Au wichtigi Mietiinahme falled ab em Juli ewäg und ufgrund vo de wirtschaftliche Entwicklig isch au mit Iibuesse bim Sponsoring z rächen. All das zämme het de Vorstand dezue brochd, freiwillig abzstiige und i de Saison 2020/21 in de 2. Liga regional z spile.