Kommentar vo de Redaktion zu de Budgetberotig im Iiwohnerrot. D Frog isch us oisere Sicht ned ob, sondern wann s Budget abglehnt wird: vom Iiwohnerrot hüt am Abig oder von Stimmvolch a de Urne?
Geschter, Mittwoch, 14. Oktober 2026 het de Wettiger Iiwohnerrot öppe 4 Stund übers Budget 2027 diskutiert. Dodebi isch über 34 Aaträg abgschtumme worde, wobi di vo de Finanzkommission meischt e Mehrheit gfunde hend, die vo de SVP und de GLP ned. S Ziil vo de Finanzkommission isch es, d Stüürfuesserhöchig statt um 15 uf 12 % vom Stüürfuess z begrenze. Dodefür het de Iiwohnerrot diversi Iisparige und Mehriinahme bschlosse, wo es in sich hend.
Zwöi Bispil:
Bi de Musikschuel selled d Elterebiiträg um 50 % stiige und dodemit 150‘000 Franke Mehriinahme generiere. Alli Warnige vom zueständige Gmeindrot Christian Wassmer hend nüd gnützt. Das isch sehr schad, weiss me doch, dass s Lehre vomene Instrument di sensorische und motorische Fähigkeite vo Chind fördered. Zudem isch z erwarte, dass in Zuekunft dütlich weniger Chind de Unterricht bsueched.
Bi de Hochbaute sind Choschte für de Unterhalt und Reparature reduziert worde, was teilwiis sicherheitsrelevanti Themene wie Fenstersicherige betrifft. Aber au Folgechoschte bi verpasste notwendige Reparature isch es Thema, wo d Mehrheit im Iiwohnerrot ned interessiert het.
Us oisere Sicht stellt sich d Frog nach em Sinn vo dem Ganze. Für de allergröschti Teil vo de Stüürzahlende macht es kaum en Unterschied, ob de Stüürfuess um 12 oder um 15 % stiigd. Unter de «Sparbemühige» vo de Finanzkommission lided d Attrakivität vo Wettige enorm und viele Eltere werded das Budget an de Urne ablehne, wenn es hüt am Abig überhaupt aagnoh wird. Denn au für d EVP, d SP und WettiGrüen sind di Striichige ned akzeptabel. Und d SVP, wo sich für e Biibhaltig vomene Stüürfuess vo 95 % iisetzt, isch mit all ihrne Aaträg gschitered und wird au ere Erhöchig vo 12 % ehnder ned zuestimme.
Oisi Prognose: De Iiwohnerrot lehnt hüt am Abig s Budget 2027 mit eme Stüürfuess vo 107 % ab und falls mir ois irred, wird es im November a de Urne bodiged.