Vo Fritig, 17. bis Sunntig, 19. Januar 2020 isch z Lozärn d EuroHockey Indoor Championship II 2020 vo de Männer gsi. Vo Rotwyss Wettige sind 4 Spiler und zwöi Trainer derbi gsi und sind Europameischter II worde.
De HC Rotwyss Wettige het scho vili Titel gunne und isch dodemit Erfolg gwohned. Vier Spiler – namentlich de Joel Schüpbach, de Michel und de Yves Morard und de Marco Michel – und zwöi Trainer, de Chris Elste und de Peter Fischbach, hend hüt zämme mit de Nationalmannschaft no eine drufgsetzt: si sind bi de Heim-EM Europameischter II worde und das in de letschte Sekunde!
Es isch de letschti und entscheidende Match gege Portugal gsi, mit dem sich d Schwiizer Hockey-Nati de Turniersiig gsichered het. Nach zwöi torlose Viertel het Portugal im dritte Viertel s 0:1 chönne schüsse. Schnell isch de Usgliich zum 1:1 gfalle, aber für de Titel hets en Sieg bruchd. Und der isch dann im letschte Viertel kurz vor Schluss gfalle, ganz kurz vor em Abpfiff.
Zämme mit Wiissrussland, wo s Turiir als Zwöite beended het, stigd d Schwiiz jetzt in di höchschti Klass uf und cha bi de nächschte EM gege di ganz Grosse aaträte.
Ergäbnis vo de Finalrund vom EuroHockey Indoor Championship II 2020:
Manner, 2. Division
Ufstiegsrundi:
Schwiiz – Wiissrussland 3-2
Kroatie – Portugal 4-6
Wiissrussland – Kroatie 3-2
Schwiiz – Portugal 2-1
(gege Kroatie het d Schwiiz scho im Pool A gschpild gha)
Tabelle:
1. Schwiiz 7
2. Wiissrussland 6
——————————-
3. Portugal 3
4. Kroatien 1