Wettige het au im 2020 en Staatswy

Gmeindamme Roland Kuster gratulierd em Meinrad Steimer

Sit vilne Johr het de Kanton Aargau kei eigedi Rebe meh und kürt de Staatswy per Juryentscheid. Im 2020 isch das es 15. Mol gsi und e chli anderscht gloffe wi schuscht.

D Corona-Krise het au bi de Kürig vom Aargauer Staatswy Uswirkige gha. Di üblich Fiir uf Schloss Liebegg het ned chönne stattfinde. Us dem Grund hend sich mehreri Delegatione nach de Finaldegustation uf de Wäg zu de Gwinnerinnen und Gwinner gmachd und d Diplom und Gschänk überreichd.

So isch de Landamme Markus Dieth mit de Grossratspräsidenti Edith Saner, de Staatsschriberi Vincenza Trivigno und witere Jurymitglider miteme alte Postauto zu allne Gwünner gfahre. Als letschts sind si am Abe uf Wettige cho, um em Meinrad Steimer und sinere Familie zum Sieg in de Kategorie «Rote Spezialitäte» z gratuliere. Er het mit em Wettiger Pino Moor Barrique 2018 gunne.

Härzliche Glückwunsch au vo ois.