Vor 100 Johr, am 6. Januar 1920, isch di reformiert Chilegmeind Wettige-Noiehof per Dekret vom Grosse Rot vom Kanton Aargau gründ worde. D Chilegmeind het das am Tag vorher miteme Fäschtgottesdienscht gfiired.
Im Rahme vom 975-jährige Jubiläum vo Wettige und de «Perleschnur», wo d Gmeind fürs Jubiläumsjohr ins Läbe gruefe het, het di reformiert Chilegmeind ihr 100-jährigs Bestoh gfiired. Nebe de eigede Mitglieder und de Pfarrei- und Chilegmeindröt vo de katholische Schwöschtergmeinde, sind au Behördeverträter vo de Iiwohnergmeinde Noiehof und Wettige iiglade gsi. Vili Mönsche sind de Iiladig gfolged, so dass d Chile bim Fäschtgottesdienscht und aaschlüssend de grossi Saal vom Chilegmeindhuus Wettige bim Apéro guet gfüllt sind gsi.
De Gottesdienscht, wo vo de ordinierte Mitarbeitende vo de Chilegmeind gmeinsam gschtalted worde isch, het, passend zum Thememonet vo de «Perlenschnur», unter em Motto «Ufbruch» gschtande. De Pfarrer Lutz Fischer-Lamprecht het in sinere Predigt d Ufforderig an de Abraham und d Sarah, ihri Heimet und ihri Familie z verloh, um in das Land z ziehe, wo Gott ihne würd zeige, mit de Useforderige verbunde, wo di Reformierte in Wettige und Noiehof gha hend und witerhin hend. Immer wider hets Muet bruuchd, um Entscheidige z träffe, wo ned numme di eiged Generation, sondern au für kommendi prägend si gsi und witerhin sind.
Bim Apéro het für de Gemeindrot Wettige, wo durch de Philippe Rey, de Markus Haas und de Gmeindamme Roland Kuster verträte isch gsi, letschtere s Wort ergriffe. Er het di gmeinsame Useforderig in de Mittelpunkt vo sinere Gruessbotschaft gschtellt, wo d Iiwohnergmeind und d Chilegmeind müend bestoh. Für de Gmeindrot Noiehof het sich de Fred Hofer se Glückwünsch aagschlosse und d Regula Arnitz het d Grüess vo de römisch-katholische Chilegmeinde überbrochd.
Dütlich worde isch, dass d Chilegmeind im Blick uf d Mitgliederzahle und d Finanze ned de Kopf wot in de Sand stecke, sondern vorausschauend wot handel und muetigi Entscheid fälle, wo si nötig sind.
D Predigt vom Pfr. Fischer-Lamprecht cha me do finde und de Vloger Reto Schläppi het es chlises Video über di Aalass gmachd, wo me do cha aaluege.