Im 1961 het d Gmeind Wettige s Feriehuus z Ftan chauft. Wil die aastehend Sanierig tüür wär und d Uslaschtig schlächt esch, stoht au en Verchauf zur Diskussion.
D Ligeschaft z Ftan, wo d Gmeind im 1961 chaufd het, esch em 1963 zum Feriehuus umbaud worde. Grösseri Sanierige het me im 1984, 2001 und em 2012 vorgnoh. In de nächschte föif Johr sind witeri Instandsetzigsmassnahne notwendig, bsunders us energetische Gründ. D Fassade, s Dach, d Fenster und d Heizig müend erneuered werde. Wil d Belegig vom Huus rückläufig esch und au d Schuelpfläg keis grosses Interesse für Schuellager signalisiert hed, hed de Gmeindrat verschednigi Variante prüefd, inkl. en Verchauf, wo aber vom Iiwohnerrot müesst gnehmiged werde.
Aber au e Vermietig oder Verpachtig esch e möglichi Variante. Us dem Grund sind Interessente iiglade, bis Ändi 2020 es entsprächends Angebot mit eme Konzept iizreiche. Bi Rückfrage dodezue git de zueständig Gmeinderot Martin Egloff, Ressortvorsteher Hochbau und Ligeschaften, gärn Uskunft.