Bi de Sitzige am Mittwoch, 14. und Donnschtig, 15. Oktober 2026 gohts ums Budget 2027 und e Stüürfuesserhöchig vo 15%. Wil mit viel Zuhörende grächned wird, finded si im Tägisaal statt.
D Finanzlag vo Wettige isch prekär. Di gebundene Usgabe bsunders bi de Pfläg, aber au in anderne Beriich, sind in de letschte Johr starch gstige, d Stüürerträg gsunke. Das het zu mehrere, teils massive negative Jahresabschlüss gfüehrt, wo zueme Minus vo öppe 11 Millione Franke gfüehrt, wo au irgendwann vo de Stüürzahler muess zahlt werde.
De Gmeindrot het sich für Choschtewahrheit entschiede und beaatraid e Stüürfuesserhöchig vo 15 % uf 110 %, d Finanzkommission wot numme um 12 % ufe und stellt dodefür verschidnigi Chürzigsaaträg, u.a. bi de Musikschuel und de Bibliothek, aber au bi de Planig für de Schuelruum. Alles ned ohni Risiko, würd doch d Attraktivität vo Wettige fescht liide und e Verzögerig bi de Schuelruumplanig zu tüüre Provisorie füehre.
D Meinige zum Budget gönd vo rächts bis links wit usenand und es wird sich zeige, ob bi em «Erfolg» vo de Finanzkommission für en Stüürfuess vo 107 % ned en «unheiligi Allianz» s Budget 2027 ablehnt, sigs im Iiwohnerrot oder später a de Urne.
Gäscht, wo ins Tägi statt in de Rothuussaal müend cho, chönd sich uf en kontroverse und lange Abig iistelle, zumindest am Mittwoch.