De Gmeindrat Wettige hed de Budgetentwurf für 2021 veröffentlicht. Er wot wege de Ablehnig vom Budget durch d Stimmbevölkerig uf e Stüürfueserhöchig verzichte, au wenn er stigendi Choste und sinkendi Iinahme erwartet.
Corona wirkt sich au uf d Finanze vo de Gmeind Wettige us. Au wenn me no ned cha säge, wie starch, rächned de Gmeidrat mit Minderiinahme vo öppe 3 Millione Franke, also um die 6 Stüürprozent. Dezue chömmed Mehrusgabe bsunders in de Beriich Gsundheit und Bildig, wo de Gmeindrat miteme plus vo öppe 2.3 Millione rächned, also no einisch fascht 5 Stüürprozent. Dodemit würded Wettige vorussichtlich witeri 11 Stüürprozent bruuche. De Gmeindrat het us dem Grund no einisch e Sparrundi gmachd, ums Defizit ned ins uferlose lo zwachse.
Bim runde Tisch mit de Partei- und Fraktionspräsidente esch klar worde, dass vor de Gmeind- und Iiwohnerratswahle im 2021 e Stüürerhöchig ned mehrheitsfähig esch. Zudem betond de Gmeindrat, dass d Iibuesse durch Corona erscht klar siged, wenn d Rechnig 2021 vorligd. Us dem Grund wot de Gmeindrat erscht im 2023 e Stüürerhöchig beaatrage, goht aber devo us, dass es dann 5 Prozent werded sii. En Schuledeabbau wär dann ab em 2027 mögli.