D Brugg vo Noiehof uf Wettige isch sit hüt gschperrt!

Rund um Wettige isch de Vercher starch beiiträchtiged. Dass d Brugg vo Noiehof uf Wettige sit hüt numnme no i de Gegerichtig befahrbar isch, führt zu lange Staus.
D Automobilischte, wo jetzt zum Fiirabe Richtig Wettige unterwegs sind, bruuched hüt vil Geduld und es wird bis im November eso bliibe. Wi d Limmattaler Nochrichte scho aafangs Monet gmelded hend, isch d Brugg zwüsche Noiehof und Wettige bis im November 2020 numme no vo Wettige her Richtig Noiehof für Auto passierbar. Wer vo de Autobahn oder vo Noiehof her uf Wettige wot, muess entweder de Wäg über d Autobahn und de Aaschluss Wettige-Oscht neh oder Richtig Bade über d Hochbrugg uf Wettige.
Beides, so hend mir hüt vo Automobilischte vernoh, bedüted vor allem erscht emol Satu. Scho am Namittag hend di erschte fascht e halb Stund länger uf Wettige gha, au wil vo Noiehof her bim em Schuelhuusplatz d Grüenphase vom Lichtsignal meischt numme drü Auto rächts um de Rank umme loht. Wer über de Aaschluss Wettige-Oscht wot fahre, stoht im Bruefsvercher eh oft im Stau. Der het sich jetzt au verschärft.
Dass Google Maps bisher kei Sperrige uf de Brugg vo Noiehof uf Wettige aazeiged, dörfd s Problem au ned grad entschärfe. Blibd abzwarte, ob sich d Lag beruhiged, wenn alli emol wüssed, welli Wäg si müend neh.