Am 9. Mai 2024 öffned s Gartebad im Tägi in di noi Saison. D Gäscht chönnd sich uf di komplett sanierti Badi froie.
Im September 2022 isch de Spatestich für d Sanierig vom Gartebad gsi. Bewusst het me d Sanierig eso terminiert, dass si zum gröschte Teil über zwei Winter isch usgführt worde, zum de Badibetrieb möglichscht wenig z störe. Jetzt isch d Sanierig vom Gartenbad fascht abgschlosse und d Gäscht chönnd sich ab Uffahrt dete vergnüege.
Scho sit em 2023 gits im Gartebad en Strömigskanal, Sprudelliegene und e «Blubber Area». Au de Beriich für d Chind hend mit em Piratespielplatz und em Fallschutzbelag im Chinderplanschbecki an Attraktivität für Familiene gwunne.
Noi sind jetzt s Schwimmer- und s Nichtschwimmerbecki us Chromstahl, s Springerbecki isch noi gstriche und bim Minigolf hets es nois Sanitärgebäud.
De Iitritt blibt unverändered zum letschte Johr, au wenn d Chöschte gstige sind und bis zum 9. Mai cha me bim Chauf vomene Saisonabo mitemem Frühbuecherrabatt 10% iispare.
Vom 7.-9 Juni fiired s Tägi dann sis 50.-jährig Jubiläum. Dodezue hets Tägi-Team es usserordentlichs Programm uf d Bei gstellt: Bligg, Claudio Zuccolini und de Pepe Lienhard mit Big Band sind numme e paar vo de viele Höhepünkt. Am Tag vo de offnige Tür, 7. Juni 2024, isch d Iitritt für alli choschtelos. Tickets und alli Infos gits uf: www.taegi.ch/50-jahre-taegi/