Wenn ihr euch am Samstig froget, wieso so viel Füürwehrlüt in Wettige unterwegs sind:
Dä Samstig findet z`Wettige im Tägi de 50. Aargauischi Füürwehrmarsch statt.
D Füürwehr Wettige dörf zum 3te und zuglich zum letschte Mol Gastgäber vo dem kantonale Füürwehrmarsch si.
Mehr wie 900 Marschteilnehmer sind für de Start aagmeldet.
Losglaufe wird im Tägi, vo det us gohts via Herterehof durs Eigi zum Reservoir Birch wos en Getränkeposte git. Witer gots den über de Grüetziweg bis zum Restaurant Schloss Schartenfels. Uf de Terasse bechömed alli Marschteilnehmer e Zwischeverpflegig über. Gstärcht gots witer durch Nochbergmeinde Ennetbade und Bade, de Marsch got de Limmat no druf bis zrugg is Tägi.
Im gsammte werdet öppe 15 Leistigskilometer absolviert. Sieger isch ned die Füürwehr wo die schnellschti isch, sondern die Füürwehr wo am meischte Marschteilnehmer cha motiviere zum Starte.
Im Tägi wird nachem Marsch no Kammeradschaft pflegt. Ufem Smoker werdet 150kg Schweinshals gart, es söll kein Marschteilnähmer hungrig heigo. I dem Sinn dankd d Füürwehr allne Sponsore. Ohni Unterstützig wär de Marsch ned realisierbar gsi.
Mer wünsched der Füürwehr Wettige schöns Wetter, kei Unfäll und guets Glinge bim Verträtte vo Wettige im Kanton.