De Aatrag vom Gmeindrot an de Iiwohnerrot, de Stüürfuess uf 110% z erhöche, schlaht höchi Welle. Mir hend mit em zueständige Gmeindrot, em Orun Palit gred.
Wettiger Nochrichte: Die 15 % sind en Schock für alli Stüürzahler. Het me ned früehner müsse de Stüürfuess ufetue und isch es en Fehler vo dir gsi, d Stüürerhöchige jahrelang z bekämpfe?
Orun Palit: Nei, weil de Iwohnerrot wie auch ich de Zahle vom alte Gmeindrot glaubt händ. Sie händ i de letschte 3 Johr immer es usglichenes Budget präsentiert. Sie händ suggeriert, das Stüürinnahme mindestens wie de kantonale Durschschnitt stigt, was nöd de Fall gsi isch!
WN: De alt Gmeindrot het drümal e Stüürerhöchig beaatraid und het ja Gründ defür gha. Was het dich damals ned überzügt bi de Budgets?
Orun Palit: Er het damit u.a. welle d Schulde reduziere, was eh nüd brocht hätti bi 350 Millione Schulde. Und bi de Vorfinanzierierig vom Oberstufenzentrum han ich de Stüürfuesserhöhig zugstimmt, aber es isch für andere Sache brucht worde! De alti Gmeindrot hät immer vo stiigende Stürerträg gesproche! Darum hät er homöopathische Stürfuesserhöhig agstrebt! Scho de alti Gmeindrot hätti sölle an Analyse mache, isch aber nöd gmacht worde. Mer händ jetzt e Arbeitsgruppe dafür bildet, wie mer Stüürsubstrat in Wettige erhöhend chönnd. Dezu hät der alti Gmeindrot die gebundene Chöschte, und das sind die Millione-Pöschte im Budget, immer zwenig hoch budgetiert! Drus use isch jetzt an Verlustvortrag vo ca. 10-11 Millione Franke entstanden! Das strukturelle Defizit muess jetzt apackt werde! Der alte Gmeindrot häts nöd gmacht! De neui GR machts jetzt! Min Slogan im Wahlkampf isch gsi: Die Finanzen in Wettingen ins Lot bringe!
WN: Was het die Analyse brochd, vo dere du gred hesch?
Orun Palit: Jetzt häm mer ehrliche Zahle uf em Tisch und jetzt chömmer besser über d‘Finanze diskutiere! Wäm mer a Wohngmeind si oder doch eher Gmeind mit allem drum & dran! Ich bin gspannt uf d‘Diskussion!
WN: Mit wellne Argument wotsch du bisherige Gegner vonere Stüürerhöchig überzüüge, dass si denen 15% zuestimme?
Orun Palit: Mer mühend de Bevölkerig das strukturelle Defizit erkläre, mer mühend besser kommuniziere was gebundene Usgabe sind und dass die ide letzte 6 Johr um 6 Mio Fr. gestiege sind, Stürinnahme aber nöd! Mer werdet an Bevölkerugsalass am 5. November organisiere. Mer wänd offe & transparent kommuniziere und alli Stakeholder vo dere Stürfuesserhöhig überzüüge!
WN: Sind de Martin Fricker, de Thomas Bodmer und du jetzt no Fründe?
Orun Palit: Aber sicher! Mer chönd Person und die politische Meinug sehr guet tränne
(S Interview hend mir schriftlich gfüehrt.)