De Gmeindrot het hüt s Budget 2027 präsentiert. Sis Ziil isch, dass Wettige läbeswert, aktiv und handligsfähig bliibd.
Für de noi Finanzverantwortlich vom Gmeindrot, em Orun Palit, chunnd e Herkulesufgab zue. Er muess es Budget dur de Iiwohnerrot und e Volksabstimmig bringe, wo e Stüürfuesserhöchig vo 15% uf en Stüürfuess vo 110% vorgseht. Nach drü negative Jahresabschlüss und eme absehbare Defizit fürs 2027 isch s gsetzlich vorgschribeni mittelfristige Huushaltsgliichgwicht nöd geh.
De Gmeindrot verstoht di Stüürfuesserhöchig letztlich als Investition in d Zuekunft vo Wettige. D Gmeind sell attraktiv und
handligsfähig bliibe. Bildig, Sport und Freiziit, soziali Unterstützig, Kultur und Begegnig, sicheri Vercehrswäg und e pflägti und funktionierendi Infrastrukturen sind wichtig für d Attraktivität vo de Gmeind. Di Aagebot und Leistige wot de Gmeindrot erhalte und Wettige als attraktive Wohn- und
Läbesort witerentwickele.
Mit de Stüürerchöchig vo 15% schlüüst s Budget 2027 usgliche ab. De Gmeindrot schriibd zudem, dass die zuesätzliche Iinahme di finanziell Grundlag schaffed, zum wichtigi Leischtige sichere, notwendigi Investitione witerzfüehre und de Handligsspiilruum für kommendi Generatione z bewahre.
Ändi 2025 isch d Nettoschuld bi 113.82 Millione Franke gsi, was 5’175
Franken pro Iiwohner bedütet. Gliichzitig isch de Normstüürertrag um 2.8 Prozent gsunke, während de kantonali Durchschnitt um 9.1 Prozent zuegnoh het. Aber ned numme d Iinahme, au d Usgabe hend sich verändered: Die sächs grösste gebundene Usgabepositione, also settigi, wo uf gsetzliche Vorgabe oder übergordnete Entscheid zwingend sind, hend sit em 2021 um 5.84 Millione Franke zuegnoh. Das entspricht öppe elf Stüürfuessprozent. D Gmeind cha uf di Leistige und ihri Choschte numme wenig Iifluss neh. Gliichwohl het de Gmeindrot gspart, Leistige überprüeft, Usgabe priorisiert und Investitione verschobe. D Aagebot und d Leistige, wo d Attraktivität vo Wettige präged, selled aber erhalte bliibe.
Gliichzitig sind au Investitione wichtig, z.B. in d Schuele, de Hochwasserschutz und anders.