Wie Schüelerinnen und Schüeler vo de Kantonsschuel Wettige brichted, isch es übers Pfingstwochenänd zu heftigem Vandalismus im Chloschter cho. Büecher sind uf de Dächer verteilt worde und Kunstwerk beschmiert.
De Schock isch gross gsi, wo Schülerinne und Schüeler hüt am Morge an d Kanti cho sind. Büecher sind uf em Dach vom Chrüzgang, uf em Grüst vom Chileturm und in de Gäng verstreut gsi. De «Reigen der Alraunen» vo de Klodin Erb, wo de noi Westflügel ziert, isch mit «FCK KSWE» besprayt und au anderi Sprayereie hets geh, wie de Blick brichted. D Kantonspolizei sig vor Ort und het d Ermittlige ufgnoh. Au «FCZ»-Spayereie hets geh, wo dezue füehred, dass me d Täterschaft in dem Umfäld vermuetet. Au d Frog, ob es di gliiche Lüt siged, wo vor öppe zwöi Woche bi de «Uselütete» vo de Kanti Wettige Maturandinne und Maturande mit Eier, Essig und Mehl beworfe hend, stoht im Ruum.
D Kapo isch dra, alli Beschädigunge ufzneh und isch uf de Suechi nach Hiiwiis, wo Rückschlüss uf d Täterschaft zuelönd.
