De Kunstrase uf em Schuelareal Margeläcker wird wider abbaud. Eigentlich esch es e super Sach gsi!
De mobil Kunstrase uf em Schuelareal Margeläcker isch sit em Dezember in Gebruuch und sehr beliebt gsi. Es esch es Pilotprojekt gsi wäge de UEFA Women’s Euro 2025, ufgstellt vom Kanton, em Aargauer Fuessballverband und de Gmeind. Vereine und Lüt us de Region hend de Platz au mega flissig und gärn gnutzt.
Aber dFreud esch leider nume churz gsi, will de Rase wieder abbaud wird. De Grund für das schnelle Endi esch absolute Frust: Mutwilligi Beschädigung und Vandalismus. Sit de Rase det esch, esch er immer und immer wieder absichtlich kaputt gmacht worde. Mittlerwile het de Rase hufewiis Brandlöcher. Will d Zerstörig so schlimm worde esch, hend di Verantwortliche d Notbräms zoge und baued de Platz vorzitig ab.
Das wär’s dänn gsi mit dem Projekt z Wettige. De Platz wird jetz wieder gflickt und denn vom Kanton und em Fuessballverband enere andere Gmeind übergeh. D Hoffnig bliibd, dass de Umgang mit em Kunstrase in de Neue Gmeind sorgfältiger esch.