Wettige started es Förderprogramm für d Entsigelig vo Privatfläche, wo vo de Asphaltknackerinne begleitet wird. Das hilft em Klima und de Ökologie.
Z Wettige gits, wi au in andere Gmeinde, im Siedligsgebiet vili versigleti Fläche. Meh, wie notwendig wäred. Vorplätz und Zuefahrte chönnd au entsigled werde, was d Versickerig vo Regewasser ermögliched, zur Abküehlig biitraid und Läbesruum für Tier und Pflanze schaffed. D Gmeind het längscht mit chlinere Entsiglisprojäkt aagfange, wie uf em Rothuusplatz oder an de Staffelstross, aber en grosse Teil vo de versiglede Fläche isch in Privatbsitz. Mit Unterstützig vo de Mobiliar Gnosseschaft lancierd d Gmeind es Förderprogramm, wo hilft, dass Privatpersone Fläche ufbräche und si durch naturnöchi Begrüenig ersetzed.
Finanzielli und fachlichi Unterstützig
Wend ihr meh Grüen statt Grau uf oire Parzelle? Dann melded oich bi de «Asphaltknackerinne», wo das Förderprogramm fachlich düend begleite. Es git e choschtelosi Erschtberotig, wie me d Flächi, wo me chönnd entsigle, ökologisch und klimatisch cha ufwerte. Au d Entsorgigschoschte vom ufbrochenen Asphalt oder Beton werded übernoh. Mitmache chönd Privatpersone (Eigetümmerinne und Eigetümer), Gnosseschafte und chlineri Unternehme mit maximal 20 Mitarbeiter. Unterstützt werded Projäkt uf Fläche bis maximal 100 m2 . Vorussetzig isch, dass di noi gestaltete Berich wasserdurchlässig sind und naturnah
begrüent werded. Umgsetzti Projäkt werded dokumentiert und uf de Website vo de «Asphaltknackerinne» veröffentlicht, zum witeri Eigentümer für en Umgstaltig z animiere. S Förderprogramm laufd, solang Mittel zur Verfüegig stönd.