De Top-Scorrer vo de Futsal Maniacs, de Alessandro Facchinetti isch alles gsi, vo dem me im Schwiizer Futsal cha troime: Cupsieger, Schwiizermeischter, Nationalspieler. Aber am End vo dere Saison isch Schluss.
D Erfolg, wo de Alessandro Facchinetti als Futsaler cho vorwiise, lönd sich lah gseh. Am 11. November 2011 isch er es Gründigsmitglied vo de Futsal Maniacs gsi. In de folgende 13 Johr isch er Gschäftsführer vom Verein gsi und het in de Zwüscheziit sin Vater als Präsident abglöst. Er isch in de Johr 2011, 2013, 2014 und 2015 AFV-Futsal-Cup-Sieger worde, het im 2011 und 2012 en Doppelufstieg, zerscht in d Nationalliga A, dann in d Swiss Futsal Premier League, erläbt, isch im 2013 und 2015 Schwiizer Vizemeischter worde und 2016 Schwiizermeischter. In de Swiss Futsal Premier League het er am 3. März vo dem Johr sis 200. Goal gschosse. Au international isch er engagiert gsi und het in de Ziit von September 2011 bis Oktober 2019 für d Schwiiz 32 Länderspiel bestritte und 22 Goal gschosse.
Am Saisonendi isch jetzt Schluss, au wenn de Allessandro Facchinetti em Futals verbunde bliebt, u.a. als Präsident vo de Maniacs.
Offiziell gheert wird de Usnahmefutsaler a dem Sunntig, 28. April 2024 im Heimmatch gege Küssnacht. Wil im Tägi d Mess Bauen+Wohnen isch, finded de Match in de Ännetwettiger SporthalleAue statt. De Match fangt um 1 am Mittag aa.