S Herbstfest für d Seniore isch en grosse Erfolg gsi

D Gmeind het uf de 28. September 2022 d Seniore ab 70 wider zum Herbstfest iiglade. Vor allem d Musik het in dem Johr für Begeisterig gsorged.

Meh wie 400 Lüt hend sich im Eventsaal vom Tägi versammled, zum bin Herbstfest debi z si. Am Iigang hend verschidnigi Organisatione, wo im Seniorebereich tätig si, Infoständ gha, wie s Alterszentrum St. Bernhard, d Spitex, KISS oder GGW.
Eröffned worde isch de Aalass vom zueständige Gmeindrat Philippe Rey und au de Gmeindamme Roland Kuster het d Seniorinne und Seniore begrüesst. Nach eme Fitness Warm-Up mit de Denise Zumsteg und ihrem Team vom Fitnesscenter Physioflex, wo scho vo de Band Greyhair Company unterstützt worde isch, het d Band richtig losglegt. Vili rockigi Lieder sind z höre gsi und dezwische het au s Zvieri und s Löse vom Chrüzworträtsel ned dörfe fehle.
Gegen End vom Namittag sind dann d Sieger vom Chrüzworträtse zoge und bekannt geh worde. Dank grosszügige Sponsore het es attraktivi Priise geh, als Hauptpriis, gsponsered vo de Denise Stöcklin und em Emil Schmid, en Guetschii über 2500.- Franke für Ferie mit Stöcklin Reise.
D Musik, wie me het vo vilne Teilnehmende het chönne höre, het bsolut de Gschmack vo de Seniorinne und Seniore troffe.