Im Juni 2020 het e Sexualstraftat z Wettige grossi Welle gworfe. De Täter isch jetzt vom Obergricht verurteilt worde.
Im Juni 2020 isch en Maa ere Frau bis in ihri Wohnig gfolged, wo es zueme sexuelle Übergriff isch cho. Jetzt liegd s Urteil vo de Beruefigsverhandlig vor em Obergricht schriftlich vor und so wird dütlich, was sich in dere Nacht z Wettige ereignet het und em Opfer no immer z schaffe macht, was sich in glägentliche Alpträum zeiged.
Am 17. August 2021 isch de Beschuldigte vom Bezirksgricht Ännetwettige de mehrfache versuechte Vergewaltigung, mehrfacher, teilwis qualifizierte sexuelle Nötigung, Huusfriedensbruch und mehrfacher sexueller Belästigung schuldig gschproche worde. Dodefür het ihn s Bezirksgricht zu 7 ½ Johr Haft verurteilt, dezue chömmed Gebühre, e Geldstrof (10 Tagessätz à 30 Fr.), Entschädigungszahlige und Buesse (500 Fr.) vo gsamthaft öppe 50’000 Franke. Zudem het er en Landesverwiis vo 12 Johr becho.
Im Täter isch das z viel gsi, so dass er s Urteil ans Obergricht zoge het. Sini Verteidigeri het in sim Name uf numme 40 Mönet Haft und e Buess vo 500 Frnake plädiert. Damit de Täter im Zwiifelsfall au e höcheri Straf cha becho, het au d Staatsanwaltschaft s Urteil witerzoge, wil schuscht s Strafmass vom Bezirksgricht d Obergränze wär. Si het 10 Johr Haft, e Buess 30 Tagessätz à 30 Franke und e Buess vo 500 Frake gfordered. Zuedem het d Staatsanwaltschaft e vollzugsbegleitendi ambulanti Massnahm gfordered und en Landesverwiis vo 15 Johr.
Verurteilt het s Obergricht de Täter zu 7 ½ Johr Haft und 15 Johr Landesverwiis und zu de Zahlige chömmed no 3/4 vo de Grichtschoschte vor em Obrigricht dezue.