D Chilegmeind het de Projektsieger präsentiert

Architheke/Nightnurse

Di reformiert Chilegmeind Wettige-Noiehof plant es nois, chliners Chilegmeindhuus. Geschter isch s Siegerprojäkt präsentiert worde.
Scho sit em 2013 beschäftiged sich d Chilepfläg vo de reformierte Chilegmeind Wettige-Noiehof intensiv mit de Megatrends, wo d Landeschilene chline rund ärmer mached, ohni dass si degege öppis chönnti unterneh. Au d Chilegmeindversammlig isch sit em 2014 immer wider über d Gründ und d Folge vo dere langfristige Entwicklig orientiert worde und d Chilegmeind het sich sither en strenge Sparkurs verordnet.

Nach zahlriche Stellereduktione het d Chilepfläg dann bi de Chilegmeindversammlig im November 2017 en Kreditaatrag gstellt, zum d Immobilie genau unter d Lupe z neh. D Frog, wie viel Gäld in de nächschte Jahr für d Chile, di beide Chilegmeindhüser und di drü Pfarrhüser brucht werde und welli Bedürfnis d Chilegmeind im Blick uf d Immobilie het, sind im Zentrum gstande. S Ergäbnis isch zum Schluss d «Immobiliestrategie 2030» gsi, wo d Chilepfläg im Oktober 2020, wege Corna mit eim Johr Verspötig, de Chilegmeind präsentiert het. D Eckpünkt vo de Strategie hend sich sither witerentwicklet und aktuell gshet si so us: d Chilegmeind konzentriert sich uf ein Standort, verzichtet uf beidi bisherige Chilegmeindhüser und baut es nois, chliners. En Instandsetzig vo eim oder beide bestehende Chilegmeindhüser wär unverhältnismässig tüür worde und wär vil z gross gsi, für di zuekünftige Bedürfnis. Erhalte werded au d Chile und s Pfarrhuus a de Lägerestrass. D Landflächi nördlich vo de Chile, wo durch en südlich positionierte Noibau frei werded, selled ere andere Nutzig zuegführt werde, zum de Unterhalt vo de verblibende Immobilie chönn zsichere.
Fürs noii Chilegmeindhuus het d Chilegmeind en Projäktwettbewerb duergfüehrt, wo vom Architekturbüro «Architheke» vo Brugg gwonne worde isch. S Siegerprojäkt und au di andere iigreichte Projäkt het d Chilepfläg am Tsischitg, 30. August 2022 de beteiligte Architekturbüros, Verträter vo Medie und Behörde, de dierekte Aawohner und de Mitglieder vo de Chilegmeind präsentiert. Jetzt goht d Baukommission an d Arbet und wot so schnäll wi mögli en Projäktierigskredit usschaffe, so dass d Chilegmeindversammlig möglichscht im November de nächscht wichtig Entscheid für d Umsetzig vo de «Immobiliestrategie 2030» cha fälle.