Im Tägi het di 30. Sportlerehrig stattgfunde. De Berni Schär het einisch meh souverän durchs Programm gführt.
Vili Sportlerinne und Sportler, wo im Tägi gehört worde sind, sind Stammgäscht bi dem vo de Sportkommission organisiere Aalass. Sigeds d Seniore vom TC Wettige, wie d Sandra Hopfner und de Martin Gloor, d Leichtathlete Claudia Meier, Walter Vonlaufen, Stephan Zulauf und Albert Meier vo LVWB oder d Teams vo Rotwyss Wettige, wo d Herre I und d U18-Dame gehrt worde sind. Aber au Handballerinne und Einzelsportler vo verschidnige Kampfsportarte sind zu Ehre cho. De Berni Schär, wo de Aalass sit Jahre jewils akribisch vorbereitet, het sich in dem Johr Au speziells lah iifalle. So het er mit em Alex Germann uf Glanzzite vom FC Wettige zruck glueged, aber au de «Fall Klötzli» belüchtet, wo em Germann und drü andere Spieler langi Sperre brochd hend. Als special guest isch au d Karin Suter-Erath do gsi, wo im Rollstuhltennis und -badminton in ihre lange Karriere vili Medaille gwonne het und de Marcel Käufeler, wo d Olympische Spiel z Peking knapp verpasst het, aber mit em Team Schwaller in vier Johr wot debi si.
De Spezialpris für es «unverzichtbars Vereinsmitglied» het d Barbara Meier vo de Behindertesportgruppe übecho, wo sit Jahrzehnte s Aktuariat füehrt. Zum Abschluss isch dann no de Kudi Müller gehrt worde, der wo bi de Organisation vom Aalass jewils di meischti Büez het.