Am 13. Februar 2022 isch d Abstimmig über s «Bundesgsetz über es Massnahmepaket zugunste vo de Medie». Hend ihr Euch scho mol gfröged, wie mer eus finaziered und ob mir au öppis übechämted, wenn s Stimmvolk ja said?
Der Artikel vom e-Journal (Rundschau) het eus uf d Idee brochd, Euch eusi Finanzierig offe zläge, au wenn es da eigentli gar ned veel z schriibe ged. Mir finanziered eus nämlich selber und schaffed gratis!
Fixi Choschte hend mir nunme dur d Website, s Equipment wie Compi, Kameras und Mikrofon sind im Privatbsitz vo Eus beidne und Eusi Ziit esch Freiwilligearbet.
Ganz selten emol steckt ois öpper es Nötli zue, bsunders wenn mir es Interview bieme Gwerbtribende mached, aber bis jetzt händ mir das Gäld jewils gspend, einisch de Notschlafstell und einisch de Helvetic Waves. De Reste isch ineme Couvert bi eim vo eus.
S «Massnahmepaket zugunste vo de Medie» het uf eus kei Uswirkige. Eus gits numme online, so dass de Rabatt für d Zuestellig keis Thema für eus isch und Onlinemedie werded numme unterstützt, wenn sie e Bezahlschranke händ. Anderscht wie bispilswis d Annegret Ruoff und de Stefan Bernet im obe verlinkte schriibe, isch de Journalismus bi eus es Hobby. Mir schriibed, filmed und föteled, we mir Lust und e chli Ziit hend und mir froied eus über Lüt, wo eus au emol en Artikel zueschicke. Eigentli isch ja s Ziel vo de Wettiger Nochrichte, dass Wettiger für Wettiger schriibed. Neutral formulierti Artikel in Mundart, zämme mitere Foti a eus schicke, und d Chance isch gross, dass euche Verein, euche Aalass oder euches Gwerb bi eus e chli Riichwiti übechund.
Au das no zur Transparenz: Sit mit aafangs 2018 vo wettiger-nochrichte.net uf wettiger-nochrichte.ch gwächsled hend, isch eusi Site meh wie 300’000 Mol ahklickt worde.
Härzlichi Grüess Fabi und Lutz