Hallebad, Eventsaal und d Iisbahn vom Tägi sind saniert. Jetzt isch s Gartebad dra.
Scho bi de Sanierig vom Tägi isch klar gsi, dass es e zwöiti Etappe wird bruuche. Au s Gartebad muess saniert werde. Dodefür isch s Baugsuech scho iigreicht worde, wie d Tägi AG mitteild. Planed isch en Ernoierig vo de Badtechnik zum de aktuelle Bestimmige grecht z werde. D Becki werded mit Chromstahl uskleided, zum de Unterhalt verringere und bim Nichtschwimmerbecki gits Aapassige, zum di hütige Sicherheitsvorschrifte z erfülle. S 50-Meter-Becki sell zudem im Winter miteme Ballon, also ere demontierbare Schwimmhalle, deckt werde. So gits im Winter e grösseri Wasserflächi, dass s Tägi zueme kantonale Schwimmleistigszentrum für de Ostaargau werde cha. Dodefür finded Gschpröch mit verschiedene Stelle statt zum Kostebiträg für d Schwimmhalle z übecho, schriibd d Tägi AG.
D Sanierig sell im Herbst 2022 starte und in Etappe über zwöi Winter im 2024 abgschosse si. D Koste traid d Tägi AG und rächned mit öppe 9 Millione Franke.