Au de Regierigsrot bewilliged d Corona-Demo ned

Covid-Massnahmegegner z Bärn (Foti: Wikimedia)

D Beschwerde vom Verein «Aktionsbündnis Aargau-Züri für e vernünftigi Corona-Politik» isch vom Regierigsrot hüt abgwise worde. De Regierigsrot stützt d Argument vom Gmeindrot.
De Gmeindrot Wettige het am 12. April 2021 de Aatrag vom Aktionsbündnis abglehnt, am 8. Mai z Wettige e Demonstration gege d Corona-Massnahme durezführe. D Begründig isch gsi, dass d Iihaltig vo de Maskepflicht durch d Organisatore ned sichergstellt sig und d Polizei si bi de erwartete Aazahl Teilnehmendi ned chönnd duresetze. De Regierigsrot stützt den Entscheid und wist d Beschwerde vom Aktionsbündnis ab.
In de Mediemitteilig, wo de Kanton veröffentlicht het, erlütered de Regierigsrot witeri Gründ, für d Abwisig vo de Beschwerde. Politishci und zwivilgsellschaftlichi Kundgebige siged zwar grundsätzlich zuelässig und es sig au keis Schutzkonzept defür nötig. Gliichwohl sig es aber zwingend notwendig, dass sich di Teilnehmende an d Schutzmassnahme halte und demnach au e Maske müessted träge. De Sicherheitsdienscht, wo d Gsuechsteller hend welle ufbüte, sig ned usreichend, zum d Maskepflicht bi de erwartete Aazahl vo 6’500 bis 8’000 Teilnehmende durezsetze. Glichzitig zeigi d Erfahrig, dass bi verglichbare Veraastaltige d Maskepflicht vo de meischte ned beachted worde isch. Au s Duresetze vo de Maskepflicht dur d Polizei sig bi de planti Grössi vo de Demo ned mit verhältnissmässige Mittel mögli.
De Regierigsrot gseht us dem Grund es überwiegends öffentlikchs Interesse, dass d Kundgebig z Wettige ned duregführt wird. Im Vorligende Fall gwichtet de Regierigsrot de Gsundheitsschutz höcher wi Versammligsfreiheit. Nach meh wi eim Johr Kampf gege d Pandemie sig klar, dass d Gsamtheit vo de Massnahme d Usbreitig vom Virus verlangsamed oder gar stopped, au we de Nutze vo einzelne Massnahme vilicht ned s Messe sig. Zudem gfähreded d eilnehmde ohni Maske ned numme di eiged Gsundheit, sondern au di vo andere. Us dene Gründ chönnd d Kundgebig ned bewilliged werde.