Am Donnschtig, 29. April 2021 heds Forum 5430 zunere Mediekonferenz iiglade. Nach 20 Johr i de Gmeindspolitik machd d Ortspartei mindest 4 Johr Pause.
Au wenn s Forum 5430 numme zwöi Sitz im Wettiger Iiwohnerrot hed, esch es doch e verlässlichi Grössi im Wettiger Politikbetrieb gsi und hed mit em Marco Kaufmann 2012/2013 de Iiwohnerrotspräsident gstellt. So esch es e Bombe, wo die chli Ortspartei geschter hed lah platze …!
D Gründ send veelfältig, wie d Partei au in ihre Mediemitteilig schriibd. Die beide bisherige Iiwohnerröt, d Fränzi Widmer und de Thomas Egloff händ sich entschede, nüm aazträte und meh wot numme starki Kandidature präsentiere, kei Listefüller.
En Grund sig au de aktuelli Zuestand vom Wettiger Iiwohnerrot, wie de Marco Kaufmann betond und damit Verständnis für die Entscheid vo de beide Iiwohnerröt zeiged. De Iiwohnerrot sig immer meh mit sich selber beschäftiged und einzelni Exponente würded sich mit ihre Veelzahl vo unnötige Vorstöss z profiliere z versueche. Die wesentliche Pünkt uf de Agenda vo de Gmeindpolitik würded eso hüfig i de Hintergrund drängd.
D Mitglieder vom Forum betoned aber au, dass sie sech au ohni Sitz im Iiwohnerrot aktiv an de politische Debatte werded beteilige.