Wi de Kanton innere Mediemitteilig schriibd, isch d Verhaftig vomene Wettiger Arzt im April 2020 grechtfertiged gsi. E politisch Motivation hets ned geh.
D Verhaftig vom Wettiger Kardiolog Thomas B. am 11. April 2020 het hohi Welle gschlage. De Iisatz vo de Sondereinheit Argus gege de unbewaffnete Maa het vili Froge ufgworfe und isch in de Medie und au in de Soziale Medie breit diskutiert worde.
De betroffeni Arzt, wo nach de Verhaftig e paar Täg in de Psychiatrie z Königsfälde het müesse bliebe, het am 14. Mai 2020 bim Regierungsrot beaatrait, dass en userkantonali Stell en Administrativuntersuechig sell dureführe, au wil de Landamme Markus Dieth de Hiwiis geh het, wo zur Verhaftig gführt het.
De Regiirigsrot het de Professor Dr. Felix Uhlmann mit de Untersuechig beuftrait und de Bricht ligd jetzt vor. De Felix Uhlmann said, dass d Aahaltig vom Thomas B. zum Schutz vo Liib und Läbe vo Aaghörige und Behörde grechtfertiged gsi sig. Si het sich ned uf sini kritische Ussage zu de Schutzmassnahme zur Bekämpfig vo de Corona-Pandemie bezoge. Witer schribd de Uhlmann, dass sich de Markus Dieth, wo d Information über e möglichi Gfährdigssituation witer geh het, korrekt verhalte het. Ungenauigkeite im Verfahre hets aber bi de fürsorgliche Unterbringig vom 58-jährige Arzt geh. Di würded aber weder d Rächtmässigkeit vo de Aahaltig noch di vo de fürsorgliche Unterbringig in Frog stelle.