D Sendig «Wir sagen Danke» isch gester usgstrahlt worde

Gester, 14. Juni isch ufm Sänder TV24 d Sändig «Wir sagen Danke» usgstrahlt worde, wo scho am 29. Mai z Wettige ufzeichnet worde isch.
Dur d Sändig gfüehrt het d Christa Rigozzi und s Publikum esch live per Web-Kamera zuegschalte worde.

Eröffnet het d Sändig d Volksmusiggruppe Heiweh metm Lied «Zäme hebe», wärend de Sändig sind Institutione und Lüüt verdankt worde, wo ii de Corona-Ziit Isatz zeigt hend.
Unter anderem d Schwizer-Tafle wo ii dere Ziit mit de Mitarbeiter und ehreamtliche Hälfer d`Lüüt ii dere schwere Ziit unterstützt hend.
Abwächsligsriich isch si gsi, d Sändig met Uftritt vo de Breakdancce-Gruppe Dirty Hands und em Jason Brügger. Met Tanz- und Akrobatik hend si s Publikum packt und fasziniert. Au für Lacher esch gsorgt gsi metm Comedian Rob Spence. Musikalisch hend de Luca Hänni und de Florian Ast, d Linda Fäh und de Philipp Fankhauser und d Newcomerin Kiki Nam Nam de Obig begleitet und au für di Chline esch met de Schwiizer Goofe und em Lied «Lieblingsmönsche» en Uftritt zum Mitsinge und Tanze debi gsi.
Im Interview im Aaschluss hend d Leitig vo de Schwiizer Goofe d`Nikol und ihre Maa und Musikproduzent, de Roman Camenzind usm Alltag im Lockdown verzellt. Ii de Coronaziit Strukture biphalte und Homeschooling und Freiziit im Glichgwicht halte, das esch ihres Rezäpt gsi für die Ziit. Und dank de Lockerige dörfed im Summer au weder 135 Chind is Sing- und Musiglager vo de Schwiizer Goofe zum Singe und e noii CD mitgstalte.

Berüehrt hend aber au d einzelne Verdankige und Überraschige zwüsche de Darbietige vo de Künstler.
De Marc Halter us Bade het Danke gseit, er esch ah Covid19 erkrankt und isch sogar 10 Täg im KSB im Koma gläge. Ii dere Ziit hend e Nachberin met erä Whatsapp-Gruppe gründet und de Familie Halt und Zueversicht geh ihre und au en ganze Pflegeteam und de Ärzt het er Danke gseit.

D Gründerin vo de Stiftig «Lebensfreude», d Christine Lienhard bedankt sich bi ihrne Mitarbeiter, wo als Clown ii Alterheim Freud und es Lache bringed.

Au bsunderi Lockdown-Aktione sind zeigt worde, so het d Familie Mogger us em Toggeburgische ihre Wohnort vo Abfall befreit. Und de Jonas Schäfer, wo spontan ii sim Quartier es Bewegigisprogramm ahbote het, wo vorallem d Seniore vom Balkon us, gern in Aaspruch gnoh hend.

Überrascht worde esch de 9-jährig Lionel. Er het im März Geburtstag gha und het ufgrund vo de Situation möse uf es Geburtstagsfäscht verzichte – de Luca Hänni het ihn und sini Fründe defür in Europapark iiglade.

Zum Schluss chund au no Direktion vo «DAS ZELT» d Cathrine und de Adrian Steiner uft Bühni. Si bedanked sich bi de Christa Rigozzi für ihre Isatz und uft Frog ob si sich au wiiteri TV-Shows chöntet vorstelle antwortet si klar met me jo.
(gk)