S Badener Tagblatt het über d Reduktion vom Budget für Schuelreise gschribe. Was steckt dehinter?
D Gmeind Wettige muess spare. Nachdem drü Mol Stüürerhöchige an de Urne abglehnt worde sind, d Rechnig 2025 miteme Defizit vo 6.4 Millione abgschlosse het und es fürs 2026 au schlecht usgseht, het de Gmeindrot umgehend Sofortmassnahme bschlosse. Dodezue ghöred Iisparige vo insgsamt 800‘000 Franke. Wil de gröschti Teil vom Budget gebundeni Usgabe sind, also e gsetzlichi oder vertraglichi Verpflichtig bestoht, sind Iisparige numme bi «nice to have»-Usgabe mögli, also Sache, wo me gärn würd mache, wo aber ned zwingend nötig sind.
Wie ois de Christian Wassmer mitteild het, hend im Beriich Bildig en Drittel vo de 800‘000 Franke müesse iigspart werde und so het me u.a. au s Budget für Schuelreise vo 290’000 Franken um 70’000 Franken uf 220‘000 Franke reduziert. Schuelreise müend also ned numme z Fuess uf d Lägere, ins Eigi, uf de Rüsler oder in de Tüüfelschäller unternoh werde.