Am 15. September 2025 isch de eijährig Testbetrieb mit Tempo 30 auf de Schartestross und de Märzegass beendet worde. Jetzt liged d Uswertige und Analyse vor.
Si wichtigscht am Aafang: De Analysebricht zum Testbetrieb zeiged, dass Tempo 30 uf dene beide verkehrsorientierte Strosse de gwünschti Effekt gha het. De Testbetrieb isch mit umfassende Messige uf de Haupt- und allne Nebestrosse verbunde gsi, so dass me het chönne rekonstruiere, ob und wenn ja wi de lokali und de Durchgangsvercher bi Tempo 30 verhalted.
De Schliichvercher, wo in de Spitzestunde beidi Gmeindstrosse nutz, zum em zähfliessende Vercher uf de Kantonsstross uszwiiche, het sich bi Tempo 30 erheblich reduziert, ohne dass es zu negative Effekt uf de andere Gmeindstrosse oder de Kantonsstrosse cho isch.
Durch Tempo 30 uf de Schartestross het sich d Ziitersparnis gegenüber de Landstross um zwöi Minute reduziert, was di Route weniger attraktiv gmachd het. Zwöi Drittel vom Durchgangsvercher hend vo de Schartestross und Märzegass uf d Landstross gwächsled. Das het dete zu ere Vercherszuenahm vo 10 % gfüehrt, de Verchersfluss isch dete aber stabil blibe und di durchschnittlich Reisezite hend sich uf de Landstross ned fescht verändered.
De Gmeindrot zieht do drus s Fazit, dass sich Tempo 30 ohni Rechtsvortritt guet bewährt het, guet ufgnoh worde isch und d Sicherheit vo alle Verchersteilnehmer verbessered het. Au d Lärmbelastig und d s Sicherheitsempfinde het sich positiv entwickled. Us dem Grund sell es Betriebskonzept für Tempo 30 aagstrebt werde. Vorher muess aber bim Iiwohnerrot en Kredit für d Erarbeitig vomene Gstaltigskonzept beaatraid werde. Das sell im 1. Quartal 2027 passiere. Nach de Gnehmigung vomene Kredit sell uf de Schartestross und de Märzegass duurhaft Tempo 30 gelte. D Aapassige vom Strooseruum sell dann in de folgende Johr im Rahmen vo Sanierige erfolge.