Scho im Novämber 2025 hämmer i de Wettiger Nochrichte gschribe, dass die Asiatisch Hornisse z Wettige acho isch. Mittlerwile sind do immer meh einzelni Exemplar gsichtet und im Kanton gmäldet worde.
Di Asiatisch Hornisse isch en invasivi Art, wo iiheimische Insekte jagt. Im Früelig, wo d Primärneschter bout werded, isch keis gmäldet worde. Die Erschtneschter sind öppe so gross wie en Fuessball und ehner unter 2 Meter zum Bispill i Hecke azfinde. Mit zuenehmendem Volkswachstum boued die Hornisse im Sommer die viel grössere Sekunderneschter (80-100cm Durchmesser). Als Lichtbrüeter bevorzuged sie exponierti Stelle höch i de Bäum. Afangs Auguscht sind 4 Imker vom Bienezüchter-Verein Bade i de Liebegg mit em Ortigs-Grät „Vespatracker“ usbildet worde. Das lauft uf Bluetooth-Basis. Jetzt hämmer die Wuche zmittst in Wettige a de Dufourstross amene Bienechaschte es Insekt gfange, en Sender abrocht und zu zweit direkt verfolgt. Mit Erfolg! Nach ere Stund Verfolgig het i de Chrone vonere riesige Tanne im Lindehof-Quartier es Nescht chönne vermuetet werde. Leider hämmers vo unde ned geseh, wells so guet versteckt isch. Mit Hilf vom Fabi (Anm. vo de Redaktion: Oise Co-Chef-Redaktor Fabian Schmid) und sinere Drohne isch es glunge, das Nescht obe im Baum usfindig z mache. Danke dir Fabi für die toll Unterstützig! Das isch de erschti Fund vomeme Sekundärnescht z Wettige! Das Nescht isch jetzt im Kanton gmeldet, die werdet die wiitere Schritt ileite und das Nescht bald entferne. D Bekämpfig vo de Asiatische Hornisse isch primär zum Schutz vo Honigbiene und überhaupt vo de Biodiversität, wil die invasivi Art massehaft heimischi bestäubendi Insekte jagt. S Engagement für d Suechi isch uf freiwilliger Basis. Mit dem Link findet ihr no meh Infos über die Asiatisch Hornisse: https://www.ag.ch/de/themen/umwelt-natur/neobiota/invasive-tierarten-(neozoen)/asiatische-hornisse – Robi Kreimel