Nach meh wie 36 Jahr i de Reformierte Chile Wettige-Noiehof goht de Pfarrer Stefan Burkhard i de wohlverdienti Ruehestand. Vorerscht wird sini Stell vomene Stellvertreter übernoh.
Es isch e langi Ziit gsi, wo de Pfarrer Stefan Burkhard in de Chilegmeind Wettige-Noiehof gschaffed het. Sin letschte Gottesdienscht wird er am Sunntig, 26. Juli 2026, am 10i in de Reformierte Chile Wettige ha und dete wird er vo de Chilegmeind in de Ruehestand verabschieded. In sinere lange Dienschtzit in de Chilegmeind het er unzähligi Mönsche begleited, sig das bi Taufene, im Unterricht, bi de Konfirmatione, Truuige, Abdankige, bi Seelsorgegspröch und wiitere Begägnige.
S meischte Härzbluet het de Stefan Burkhard in sini Predigte gsteckt, in dene er sis enormi theologische und philosophische Wüsse het chönne iibringe. Det wird d Lücke für d Chilegmeind bsunders gross si, gliich wie bi sine Veranstaltigsreihe vo de Erwachsenebildig, vo de philosophische Rundi über s Chrüz und Quer bis zum Bibelkurs.
D 100%-Stell vom Stefan Burkhard wird ab em 1. Auguscht vom Pfarrer Adrian Beyeler verträte. Er isch bis zu sinere Pensionierig im Februar 2026 Pfarrer in der Reformierte Chilegmeind Furttal gsi. De Adrian Beyeler wird mit 60% in de Chilegmeind aagstellt. De Pfarrer Beyeler wird am Sunntig, 9. Auguscht, um 10i sin erschte Gottesdienscht i de Reformierte Chile Wettinge fiire.