D Iiwohnerratssitzig vo gester, Donnschtig, 29. Mai 2026 isch ganz im Zeiche vom schlechte Rächnigsabschluss gstande. De Umbau vom Pfarrhuus für d Tagesstrukture isch trotz Rückwisigsaatrag vo de Finanzkommission (Fiko) chnapp gnehmiged worde.
De Rechnigsabschluss 2025 miteme Defizit vo öppe 6.4 Millione Franke het d Wettiger Politik ufgschreckt. Je nach Usrichtig gsehnd die eine s Hauptproblem im mangelnde Sparwille, di andere in de drümolige Ablehnig vo de Stüürfuesserhöchig. Einigkeit gits ab schints, dass de Gmeindrot zu optimistisch budgetiert heig und so de Iidruck entstande sig, es gängdi ja scho irgendwie. Das isch offensichtlich ned de Fall, wil das Defizit öppe 12 Stüürprozent betraid und au d Rechnige vo de beide Vorjohr mit rote Zahle geended gha hend. We me bedenkd, dass di meischte Usgabe gebundeni Usgabe sind, füehrt kein Wäg anere Stüürerhöchig vorbi, d Frog wir dnumme si, wie höch si wird si und ob d Erhöhig dann würkli langed. De Blick uf d Demoskopie zeiged ja, dass d Usgabe bi de Reschtchoschte vo de Pfläg no witer werded stiige.
De Iiwohnerrot het geschter dann de Jahresbricht und d Rechnig 2025 gnehmiged. Em Rückwisigsaatrag vo de Fiko in Bezug uf di gmeinsam Wirtschaftsförderig in de Region, an dere sich au d Gmeinde Ännetwettige, Bergdietike, Birmischtorf, Ännetbade, Schpreitebach und Würelinge beteilige wend het de Iiwohnerrot zuegstumme. D Kantonsbiiträg, wo das Projäkt unterstützt hetted, bechunnd Wettige also ned. Minim anderscht sind d Mehrheitsverhältnis bi de Frog vom Umbau vom Pfarrhuus a der Erlestross gsi. Au det het d Fiko e Rückwisig beaatraid, de Kredit isch aber vom Iiwohnerrot chnapp gnehmiged worde, so dass de Ziitplan für de Umbau und d Saniirig vom Pfarrhaus für d Tagesstrukture cha iighalte werde.