Uf de Gmeindverwaltig z Otelfingen liegd es Gsuech vom Eigetümer vom Jelmoligebäud uf. Es goht um en Vorentscheid nach §323 vom Planigs- und Baugsetz (PBG) vom Kanton Züri.
Hitachi Energy wot en Campus baue, wobi d Tägerhardächer z Wettige und s Gländ vom ehemolige Jelmoli-Gebäud zur Uswahl stönd. Für de Aasidligsentscheid isch vermuetlich usschlaggebend, wo d Vorussetzige für en Aasidlig am schnellschte z erwarte sind. Z Otelfinge gseht das uf de erschti Blick besser us, wil d Aasidlig in ere Industriezone sell erfolge, während es z Wettige au no e Richtplanaapassig vom Kanton und dann au no en Entscheid vom Iiwohnerrot bruchd.
Z Otelfinge bestoht gliichwohl es Problem: Erscht in de Johr 2022/2024 isch d Bauzoneordnig aapassd worde. Dem Bschluss isch en breit abgstützter demokratische Prozess vorusgange. Es isch us planerische Sicht problematisch, nach so wenige Johr d Bestimmige z ändere oder Usnahme z bewillige. Im Gsuech für en Vorentscheid gohts um zwee Pünkt: D Gebäudehöchi überm gwachsene Terrain sell usnahmswiis höcher dörfe si, wi im Bauzoneplan vorgseh. De zwöit Punkt isch d Höchi vom gwachsene Terrain, wo sell feschtglegt werde. Wegem de Bau vom Industriegebiet in de 1960er Johr isch es zu Veränderige im Terrain cho, so dass s gwachseni Terrain nüm klar feschtzstelle isch. In de Unterlage, wo bis am 9. April 2026 uf de Gmeindverwaltig ufliged, schint s gwachseni Terrain für oisi Laieauge rächt höch aagsetzt. Wil d Verwaltig wegem Gründonnschtig scho im Halbizwöi gschlosse het, hend mir ned chönne nochfroge.