S Frühjahr isch d Ziit vo de Generalversammlige. So het sich au d SP Wettige am Tsischtig im Rothuussaal troffe.
Am 10. März 2026 het d SP Wettige iri jöhrlich Generalversammlig abghalte. D Co-Präsidentin Pia Müller het dörfe knapp 30 Mitglieder im Rathussaal begrüesse. Einigi händ sich müesse abmälde, aber niemert wil sie oder er in Thailand feschtgsässe isch. De prominentischti Abwesendi isch de Markus Maibach gsi: er het sich churzfrischtig müesse abmälde. D Ehrig vom langjährige Iwohnerrat, Gmeindrat und Vize-Ammä muess drum schpöter nochegholt werde. Aber er isch nid de einzig gsi, wo d GV gehrt het: d Karin Mosimann het während sage und schreibe 25 Johr im Vorstand d Kasse gfüehrt. Sie het de grossi Dank vo de Partei dörfe entgegenäh. Sie git ires Amt jetzt in jüngeri Händ: de Claudio Güller wird sorgfältig is Amt vom Kassier igfüehrt. Au suscht gits früsche Wind und Nachwuchs im SP-Vorschtand rund ums bewährte Co-Präsidium Pia Müller / Christian Oberholzer. Nid weniger als 9 Persone engaschiered sich neu im Vorschtand, mit de Jennifer Walter und em Andreas Freudig bringed sich zwei witeri Hoffnigsträger id Vorschtandsarbet i. De Jahresbricht het an zweisitige Erfolg vo de Wahle 2025 erinnered: einersits het d SP ein Sitz im Gmeindrat verlore, defür aber ein Sitz im Iwohnerrat gunne und isch jetzt klar zwoitschtärchschti Partei in Wettige. Das möcht si nutze: näbscht de Rächnigs-Gnehmigung und em Büdschee sind d Mitglieder informiert worde über die aktuelle politische Theme und d Ziil vo de neue Legislatur. Die zwoit Hälfti vom Obig hend die Awesende bim ad GV aschlüssende Apero verbrocht. Besser gseit bim agregte Uustusch zwüsche Junge und Läbeserfahrene, bim Pfläge vo Kontakt zwüsche Mitglieder us Wettige und Würelos, und nid zletscht im Gschpröch mitem Grossrat Alain Burger und de Gmeindrötin Kirsten Ernst.