Hitachi Energy suechd en Alternativstandort für sini Standört in de Region und wot au noii Arbeitsplätz schaffe. Wie stönd d Wettiger Parteie dezue?
D SP het sich in eme Positionspapier zu ere mögliche Aasidlig vo Hitachi Energy uf de Tägerhardächer güssered. D Partei schriibd von ere «echte Chance für Wettige und di ganz Region». D Aasiedlg vomene Konzern in dere Grössi sig für Wettige aner au di gsamti Region von wirtschaftlicher Bedütig. «Nebe noie Arbeitsplätz sind langfristigi positivi Effekt uf di gsamti regionali Wertschöpfungs-Chetti z erwarte», schriibd d SP. Durch potenzielli Stüüriinahmen chönnd sich d Gmeinde positiv witerentwickele. De gwählti Standort büti hervorragendi Vorussetzige für en erstklassigi Erschliessig dur de öffentlichn Vercher.
Au D Mitti begrüessd di laufende Gspröch über e möglichi Asidlig, wi d Partei ois mitteild het. D Partei betond, dass Hitachi Energy im 2022 d Sparte «Strom- und Energienetz» vo de ABB übernoh het und hüt scho meh wie 1‘000 Lüt in de Region beschäftiged. D Aasidlig vomene global tätige Unternehme wie Hitachi Energy chönnt wichtige Schwung für di wirtschaftlich Entwicklig vo de Region geh. Bsunders positiv gseht D Mitti d Ussicht uf zuesätzlechi, qualifizierti Arbeitsplätz und noii Lehrstelle für Lernendi. Grad die neue Lehrplätz wäred en wichtige Biitrag zur Förderig vom Bruefsnachwuchs und zur Stärchig vom duale Bildigssystem in de Region.
Gliichziitig isch für d’Partei klar, dass so en Entscheid sorgfältig prüeft werde mues. D’Interässe vo de Bevölkerig, de Umwält und e nachhaltige Entwicklig vo de Gmeind müend berücksichtigt werde. Bsunders wichtig isch debii e vorausschauendi Planig bim Verchehr. E möglechi Asidlig würd meh Verchehr mit sich bringe, drum mues mer dem Thema fescht Acht gäh. In däm Zämehang gseht D’ Mitti Wettige au die langfristigi Bedütig vonere mögliche S-Bahn-Haltstell bim Tägi, zum de öffentliche Verchehr wiiter z’stärche und e gueti Erreichbarkeit vom Standort sicher z’stelle.
D EVP het bi ihre GV am letschte Fritig, 13. März 2026 entschiede, e Mediemitteilig pro Aasidlig vo Hitachi Energy usezgeh. Di isch noch usstehend, aber d Partei het dütlich gsaid, dass d Aasidlig vomeen Unternehme in deri Grössi, wo zudem bi de Netz und de Produktion vo klimaneutralem Strom aktiv isch, sehr guet für Wettige sig. Dur e gueti Verchersplanig und e gueti Durchgrüenig vom Areal, chönnted di befürchtete Nachteil verringered werde. D Biodiversität chönnd sogar verbessered werde.
WettiGrüen betont inere Stellignahm, dass de potenzielli Mehrwert für d Gmeind vermuetlich ned z überbiete sig. D Partei fordered aber, dass di umliegende Gmeinde besser mitiibezoge werded. Wenn me d Unversehrtheit vo de ursprüngliche Landschaftsspange em Projekt würd opfere, dann setted alli vier Sachplangmeinde profitiere chönne.
Mir werded de Artikel jewils ergänze, wenn mir Infos vo anderne Partei bechömmed.