Scho sit em Dezember 2025 weiss me, dass Hitachi Energy sich in Wettige chönnd aasidle. Am Donnschtig, 12. März 2026 isch d Bevölkerig vom Mitbewerber informiert worde.
Lang isch gwerweiset worde, wo de Alternativstandort für de noi Schwiizer Hauptsitz vo Hitachi Energy chönnd si. Jetzt het am Donnschtigabe d Gmeind Otelfinge d Bevölkerig ins Chilegmeindhuus zueme Informationsabig iiglade gha, wo de Gmeindrat es «vielversprechends möglichs Industrieaasiedlig-Projekt vorstelle» het welle.
Dodebi sind di vorgsene Rahmebedingige erlüterd worde und möglichi Uswirkige uf d Gmeind, de Vercher und d Umwelt. Und ja, es isch selbstverständlich um Hitachi Energy gange, wo sich entweder z Otelfinge oder z Wettige würd aasidle, je nach dem wo si schneller chönnd starte.
Z Otelfinge wärs Projekt es bitz chliiner wie z Wettige, wil es uf em Gländ vom ehemalige Jelmoli sell z stah cho. Das Gebäud isch aber inventarisiert und würd unter Schutz gstellt, wenn sich de baurechtlich Rahme ändered. Es müessti dann vo de Kubatur her erhalte blibe, so het es bi de Versammlig gheisse. Entwickligsmöglichkeite gits nach Weste und Oste. Au s Otelfinger Projekt würd in zwöi Etappe umgsetzt und wie z Wettige gilts noch di ei oder ander baurechtlichi Hürde z neh.
Klar isch us oisere Sicht, dass d Realisierig z Otelfinge de Mehrvercher, vor dem me vor allem z Würelos schints Angscht het, ned würd verhindered werde, aber d Stüüre währed dann im Kanton Züri und ned im Aargau.