De Iiwohnerrot het sich am Donnschtig, 6. März 2026 zu de zwöite Sitzig vo de Legislatur troffe. S wichtigscht Traktandum isch de Projektierigskredit für d Schuellandschaft Margeläcker gsi.
Aagfange het d Iiwohnerrotssitzig mit zwöi Rücktritt und ere Inpflichtnahm: De Damien Campino und de Lutz Fischer hend us bruefliche und persönliche Gründ ihren Rücktritt iigreicht und de Martin Fricker isch in Pflicht gnoh worde, wil er bi de erschte Sitzig ned het chönne debi si.
Danach isch es grad ums es gwichtigs Traktandum gange: Em Projektierigskredit für s Margi. Dete sell es Oberstuefezentrum entstah, aber au e Turnhalle und witeri Sportaalage. De Gmeindrot het scho vo Aafang aa druf higwise, dass das Projekt ned meh wie 120 Millione Franke dörf choschte. Uf Aatrag vo de Finanzkommission het de Iiwohnerrot de Kredit um 750’000.- Franke uf 7’800’000.– kürzt, zum die Höchschtssumme dütlich z unterstriiche. En Aatrag vo de SVP, de Kredit ufzteile, so dass me mit de Planig ned bis zu de Volksabstimmig muess warte, het de Rot dütlich abglehnt. D Mehrheitsmeinig isch klar gsi: D Bevölkerig soll säge, ob si das noie Schule huus wot oder ned, bevor zviel Gäld in d Planig gflosse isch.
Nach dem JA zu de Schuellandschaft isch es um verschidnigi Vorstöss geh, meischt zu Verkehrsfroge. De Gmeindrot isch u.a. parat gsi, sich für e 30er-Zone uf eme Abschnitt vo de Landstross bi de Migros iizsetze und e Begegnigszone bi de Bibliothek z prüefe. D Aaträg vo de SVP, di Vorstöss ned z überwiise, hend kei Mehrheit gfunde.