Sit em Dezember 2025 het Wettige meh wie 22’000 Iiwohner. D Gmeind het di 22’000 Iiwohneri und de 22’001 Iiwohner Willkomme gheisse.
In de 1960er Johr het d Gmeind Wettige scho einisch meh wi 20’000 Iiwohner gha und dann wider ab em 2010. Sither ich d Bevölkerigszahl meh oder weniger kontinuierlich gwachse, bis si im Dezember 2025 22’000 erreichd het. Di 22’000 Iiwohneri isch e Noigeboreni gsi. D Lina Dimofte isch us dem Grund zämme mit ihrne Eltere vo de Gmeind zueme Apéro iiglade worde und au de 20’001 Iiwohner isch mit Familie begrüesst worde. Das isch de Andreas Schaf mit sinere Familie gsi.
In sinere Aasproch het de Gmeindamme Markus Haas im Rothuus d Bedütig vo dem Moment für d Gmeind betont: «S Erreiche vo 22’000 Iiwohenrinne und Iiwohner isch es sichtbars Zeiche für d Attraktivität und Läbesqualität vo Wettige. S Wachstum isch gliichzitig en Aaerkennig für s bisher Gleischtet und e Verpflichtig, d Gmeind au in Zuekunft verantwortigsvoll, nachhaltig und Vorusschauend witerzenwickle.»
De Gmeindrot wertet s Erreiche vo dere Bevölkerigszahl als dütlichs Zeiche defür, dass di iigschlagne
Entwickligsstrategie vo de Gmeind überzügt. Wege de attraktive Rahmebedingige und de höche Läbesqualität hetted sich in de letschte Johr immer meh Mönsche bewusst für Wettige als Wohnort entschiede.