D’Generalversammlig vo de Mitti Wettige isch am letschte Fritig, 27.Februar 2026, wieder guet bsuecht gsi. Es isch en Abig im Zeiche vo Veränderige gsi.
Im Mittelpunkt sind d Verabschidige vo de beide Exekutiv-Mitglieder gstande. De Roland Kuster isch nach 18 Jahr i de Gmeindspolitik, devo di letschte als Gmeindamme, verabschiedet worde. Er hät na eimal churz uf sini langi Ziit zruggglueged. Sini Erfahrig wird de Partei fehle. Au de Sandro Sozzi het nach 8 Jahr sis Amt als Gmeindrot mit em Ressort Bildig abgeh. Sis Engagement für d Schuel und d Lehrerschaft isch gross gsi, und d Partei het ihm für die Arbet herzlich danke gsaid. Beidi werded au in Zuekunft de Partei ab und zue mit ihrem Rat zur Siite stah.
D’Ursi Depentor het s Präsidium nach 8 Jahr abgeh. Sie het d Partei mit ihre unkomplizierte Art prägt und het jetzt es neus ehrevolles Amt als Iiwohnerratspräsidenti.
De Roland Brühlmann het vo ihre s Präsidium übernoh. Er bringt viel politischi Erfahrig mit, was de Mitti Wettige guet tue wird. Zudem isch de Remo Di Marco neu i de Vorstand gwählt worde.
De Christian Wassmer het vo sine erschte Woche im Gmeindrat brichted. Es isch interessant gsi z ghöre, wo de neu zämmegsetzti Rat d Schwerpünkt setzt und was für Theme jetzt apackt werded.
Zum Schluss isch es dänn traditionell worde: Bi me guete Raclette hät mer de Abig gmüetlich uschlinge laa. D’Mitti freut sich scho uf s nächste Jahr!