S erschti Wochenänd vo de Badefahrt isch vorbi. En guete Momänt für e Zwüschebilanz.
S Wetter stimmt, d Stimmig isch super und Lüt hets en masse. So laht sich s erschti Wochenänd vom legendäre Fäscht z Ännetwettige zämefasse.
Im Detail chönnd me natürli kritischer si. Eigentli isch es e chli z heiss, me gspürt aber, dass sich di meischte guet druf iigstellt hend und es schints ehnde de Getränkeumsatz duet steigere, statt de Samariter meh Büetz z mache.
Bi de Aazahl Lüt isch es, wie me bi allne cha verneh, a de Limmatpromenade bsunders kritisch. Nach oisere eigede Erfahrig isch de Hotspot zwüsche de Brugg über d Limmig vo Ännetännetwettige uf Ännetwettige mit em Promenadelift und em Tränebrünneli. Ois schint, dass bsunders bim Beizli vom serbische Verein vili Lüt wege de super Stimmig stah blibe oder auf freii Plätz warte und sich so di eh prekär Situation mit de enge Promenade und de Stäge am Ölrain no verschärft. S Glück isch, dass d Lüt bisher ruhig blibe sind, au wenn es keis «vor und zurück» geh het.