Fascht sechs Stunde esch d Iiwohnerratssitzig am Donnschtig, 20. Oktober 2022 gange. Kurz vor de Eis sind denn s Budget und d Stüürfuesserhöchig bschlosse gsi.
In ere meh wie feufstündige Diskussion het de Iiwohnerrat s Budget für 2023 berate. Mehreri Dutzend Aaträg zu einzelne Budgetpositione hend zuenere Ergäbnisverbesserig vo Fr. 315’787.50 gfüehrt.
Di gröschti Korrektur hets bi d Chürzig vo de Besoldigsaapassig vom Gmeindpersonal geh. De Gmeindrat het nach zwei Nullrunde e Aapassig vo 2 % welle. D Finanzkommission het eis Prozent gfordered, wo letschtendlich au bschlosse worde esch. D Aaträg von de SVP (0% bi Löhn über 80’000, 1% bi denne drunter) und SP/WettiGrüen (1,5 %) sind chancelos blibe.
D SVP het am Aafang en Rückwisigsaatrag gestellt gha, wo de Gmeindrat het selle verpflichte, es usglichnigs Budget mit eme unveränderte Stüürfuess vo 95 % vorzlege.
S letschti Wort hend d Stimmbürgerinne und Stimmbürger am 27. November 2022.
Wege de fortgeschrittene Ziit het de Iiwohnerratspräsident d Sitzig nach em Traktandum 1 abbroche und die witere Traktande uf d Sitzig vom 17. November verschobe.