Wer bi Ishockey nur an Manner denkt, sötti mol sTägi in Wettige bsueche, wenns heisst: „Let’s Go Argovia Stars“. Do rockend dFraue i wisse Trikots mit em rote Stern sHuus.
Fraue händ bi de Argovia Stars Tradition. E Tradition wo us em tüüfe Winterschlof verwachet isch. E Winterschlof, wo acht Johr lang duret hät. Aber hüt strahlend dArgovia Stars Ladies bi ihrem erschte Heimspiel wieder und zeigend gege dDame vom HC Luzern grossi Klass.
Für das bsondrige Eröffnigsspiel am Sunntigobe isch sTeam in de rote Tägi-Trikots uf dHeimatisbahn cho. Es isch es Team mit grosser Bandbreiti. Die jüngscht Spieleri hät de Johrgang 2011. Die ältischti 1984. S Team het im Lauf vom Obe immer besser is Spiel gfunde. Im erschte Drittel sind sie i de 10. Minute in Führig gange. Nüün Minute spöter het Luzern usgliche.
Im Mitteldrittel sind dArgovia Stars mit drü wiitere Goal devozoge und händ de Sieg nüm us de Hand geh. Zum Schluss hed si s‘erschte Heimspiel nach acht Johr mit enem 6:2 Sieg gwonne. D Ladies händ en guete Grund zum Juble.
Trotz em Sieg wünschend sich dLadies meh Kolleginne für ihres Team. Mit zwölf Stammspielerinne und 4 Nochwuchsspielerinne, wo – wenns zitlich dinnelieht – mitziehend, gits Platz für Zuwachs. Und au do, isch mer flexibel. DLadies bi de Argovia Stars spielend teilwies sit sie 4 Johr alt sind Ishockey, anderi erscht sit 8 Woche. En ideali Kombination für jungi Spielerinne zum Erfahrige bi de Grosse zsammle oder ebe für neui Spielerinne, um vo de junge und de alte Hase Tricks zlerne und vor allem Spass zha a dem schnelle und taktische Spiel.
Wer bi Ishockey nur an Männer denkt, sött villich mol an es Probetraining bi de Argovia Stars Ladies go. Übrigens sind sie zur Ziit s‘einzige Dame-Ishockey-Team im Kanton Aargau. Well die schnellschti Teamsportart vo de Welt isch scho verruckt bim zueluge. Wenn mer aber selber uf em Isfeld stoht, lebt mer 60 Minute lang echti Ladies Power. Und jublet am Endi selber.
AnHi