Spatestich für de Westflügel vom Chloschter

Am 11. Jänner 2022 het de Grossi Rat en Kredit über 17’930’000.– Franke gschproche, zum d Kanti erwitere. Hüt, am 11. August isch de Spatestich gsi.
D Chloschterhalbinsle z Wettige isch en heikle Ort zum Baue. D Kantonsarchäologie, d Denkmalpfläg, d Kanti, de Kanton als Bsitzer vom Chloschter und d Gmeid hend müesse en Wäg finde, zum Mitenand d Erwiterig vo de Kantonsschuel chönne z realisiere. Nach jahrelange Vorarbeite goht es jetzt in d Phase vom Bau vom noie Westflügel. Nach em Rückbau vo de alte Turnhalle wird an de Stell vom ehemolige Hönggerhuus en Noibau errichtet, wo de Bedürfnis vo de Kanti, aber au vom historisch bedütsame Ort entspricht. De alti Bode im Cheller wird im noi Gebäud en Ort finde und d Kubatur isch am Vorgängerbau aaglehnt, wo im 19. Johrhundert abbroche worde isch.
Bim Spatestich sind di beide zueständige Regierigsröt Alex Hürzeler und Markus Dieth aawesend gsi, vili Grossröt us em Bezirk, u.a. de Roland Kuster, Gemeindamme vo Wettige, de Markus Schneider, Stadtamme vo Ännetwettige und de Iiwohnerrotspräsident Lutz Fischer-Lamprecht, aber au Gmeindrät vo Wettige und Lüt us de kantonale Verwaltig, do drunter de Kantonsbaumeister Urs Heimgartner, de ehemolig Chef vo de Abteilig Bau und Planig vo Wettige.