Am 12. Dezember 2021 isch es uf La Gomera losgange, zum im Ruderboot de Atlantik überquere. Jetzt lieged «nunme» no chnapp 2000 Seemeile vor em Heidi.
D Wettiger Brüedere Georg, Sebastian und Peider Stocker und ihre Cousin, de Matthias Odermatt sind sit 12 Tag uf em Meer. De gröschti Teil vo de Strecki ligd aber no vor de vier Ruderer, wo im Rahmen vom de Talisker Whisky Atlantic Challenge 2021 mit ihrem Boot «Heidi» de zweitgröschti Ozean vo de Wält wend überquere. Uf de Ideallinie, also em direkte Wäg zum Ziel uf Antigua, wäred das sit em letschte GPS-Signal vo hüt am Morge, 1971.9 NM. Zur Zit sind si uf Platz 11 und dodemit immer no im vordere Drittel vo de Teilnehmende.
Wie au di andere Teams, sind d Helvetic Waves zerscht relativ wit nach Süde Richtig Kap Verde grudert, zum besseri Windverhältnis ha. In de Zwüschezit sind si Richtig Weschte unterwägs.
Mir vo de Wettiger Nochrichte wünsched em Team weiterhin viel Erfolg, wenig Blessure und e gsegneti Wiehnacht!