D Tägi AG het sin CEO verabschiedet

Drüehalb Johr het de Marco Baumann als CEO vo de Tägi AG gwirkt. Per 1. Jänner 2022 wechsled er in d Gschäftsleitig vo de Swiss Ice Hockey Federation (SIHF), wo er Director Marketing & Sponsoring wird. Am Montag, 20. Dezember 2021 isch er im Tägi verabschieded worde.
De Roland Kuster, Verwaltigsratspräsident vo de Tägi AG het bi de Verabschiedig vom Marco Baumann di Aawesende uf e Zeitreis vo de letschte drüehalb Johr mitgnoh. Scho bim Spatestich vo de Grossbaustell am 8. März 2018 isch de Marco Baumann debi gsi, am 1. Juni 2018 het er dann sini Stell aaträte. Kein Tag sig wi de ander gsi, in de zweijährige Bauziit, so de Roland Kuster. Au dur de unermüdlich Iisatz vom Marco Baumann, sig s Tägi zu dem Freiziit-, Sport- und Eventzentrum worde, wo es hüt isch. Als Erinnerig het de scheidend CEO es grosses Fotibuech übecho, wo 1001 Impressione vo de zwöijährige Bauziit z gseh sind.
De Marco Baumann isch sichtlich grührt gsi, bi sinere Verabschiedig. Er heitti länger im Tägi welle blibe, aber so e Chance, wi bi de SIHF het er sich ned chönne entgoh lah, so de Marco Baumann: «D Entschidig zwüsch sehr guet und sehr isch mir alles andere wie licht gfalle.» Mit herzliche und emotionale Wort het de Marco Baumann sinere Frau und de beide Chind danked, für d Unterstützig und d Inspiration, aber au em Verwaltigsrat, em Gmeindrat, de Gmeinmitarbeitende, , de aawesende Sponsore und Eventpartner, de Verein, wo im Tägi trainiered, sine OK-Kollege vo de platzte 975-Johr-Fiir und em Präsident und em Gschäftsführer vom Verband vo de Halle- und Freibäder und de
Gsellschaft Schwiizerischi Kunstiisbahne. En spezielle Dank het er de Mitarbeitende und de Gschäftsleitig vom Tägi usgschproche, für de unermüdlich Iisatz in de Bauziit und de langi Schnuuf in de usefordernde Coronaziit.