Iiwohnerratspräsident verabschiedet

De Iiwohnerrat het sich geschter, Donnschtig, 16. Dezember 2021, zu de letschte Sitzig vo de Legislatur im Tägisaal troffe. D Traktande sind schnell behandled gsi.
De abtretendi Iiwohnerratspräsident het di bisher längschti und mit em geschtrige Abe wohl au die chürzeschti Iiwohnerratssitzig chönne leite. D Traktande, Vorstöss bi dene de Gmeindrat parat gsi isch zum Entgegeneh und ei Interpellation, hend ned vil z rede geh. Dodefür isch dann Abschied gnoh worde: vom Forum 5430, wo nach 20 Johr im Iiwohnerrot zumindest e Pause macht und dodemit vo de Fränzi Widmer und em Thomas Egloff. Verabschieded worde sind au di witere Ratskolleginne und Ratskollege, wo ned wider gwählt oder nümm aaträte sind, namentlich d Alexandra Wernli (SP), de Christoph Fäs (EVP), de François Chapuis, de René Bosshard, de Markus Zoller (Die Mitte CVP), em Stefan Meier und em Thomas Wolf (SVP) und natürli im scheidende Iiwohnerratspräsident Christian Pauli (FDP), wo sich ebefalls in de politisch Ruhestand verabschieded. D FDP-Fraktionspräsidenti Judith Gähler het zudem de Markus Haas verabschiedet, wo aber bi de Ersatzwahl für de Gmeindrat im Februar wider wird aaträte.

Die konstituierend Sitzig für di noi Legislatur find am 27. Januar 2022 wider im Tägi statt.